27.09.2021 17:10
ԱՀ ՆԳ նախարարության ոստիկանությունն ամփոփում է անցած շաբաթը. 20.09.2021թ.-26.09.2021թ.
2021 թվականի սեպտեմբերի 20-ից 26-ն ընկած ժամանակահատվածում ոստիկանության կենտրոնական և տարածքային ստորաբաժանումների 1-02 Հերթապահ մասերում ստացվել է ընդհանուր 70 հաղորդում, որից 49-ը հանցագործությունների վերաբերյալ: Դրանցից 47-ն արդեն բացահայտվել և քննության փուլում է:
Ըստ ոստիկանության օպերատիվ հաղորդագրությունների ամփոփագրերի` անցած շաբաթվա ընթացքում գրանցվել է մարմնական վնասվածք հասցնելու 7 դեպք, բոլորը բացահայտվել են:
Ոստիկանության քրեական հետախուզության վարչության և շրջանային բաժինների ծառայողների կողմից թմրամոլության դեմ ուժեղացված պայքարի արդյունքում, ինչպես նաև «Կանեփ-կակաչ-2021» համալիր միջոցառման արդյունքում՝ բացահայտվել է թմրամիջոցների ապօրինի աճեցման և իրացման 10 դեպք:
Նշված ժամանակահատվածում արձանագրվել է անձնական ունեցվածքի գողության 3, ապօրինի ծառահատման, գույքի դիտավորությամբ ոչնչացման, շմոլ գազից թունավորման և խարդախության մեկական դեպքեր: Գրանցվել է իշխանության ներկայացուցչի նկատմաբ բռնության մեկ դեպք: Զենք և զինամթերք կամովին հանձնելու համար ոստիկանություն է դիմել 4 քաղաքացի:
Շաբաթվա ընթացքում ինքնասպանության կամ ինքնասպանության փորձ կատարելու մեկ դեպք է արձանագրվել: Իսկ Մարտունի քաղաքի իր բնակարանում հայտնաբերվել է Է.Մ.-ի (ծնված 1974թ.) դին՝ նախադաստակներն ածելիով կտրած վիճակում: Ստուգմամբ զբաղվում է ԱՀ քննչական կոմիտեն:
Յոթ օրվա ընթացքում հանրապետության տարածքում գրանցվել է ճանապարհատրանսպորտային 30 պատահար, որից 22-ը՝ նյութական վնասով, 8-ը՝ մարմնական: Բուժհաստատություն է դիմել 10 քաղաքացի: Ճանապարհային ոստիկանությունը մեկ շաբաթվա ընթացքում ընդունել է 530 գործ: Առանց վարորդական վկայականի մեքենա է վարել 28 վարորդ, 15-ը եղել են անսթափ վիճակում:
Ճանապարհային ոստիկանությունը կրկին զգոնության ու սթափության կոչ է անում:
Համակարգի ստորաբաժանումները հանրապետության տարածքում շարունակում են իրականացնել շուրջօրյա կազամակերպված աշխատանք: Ոստիկանության ծառայողների կողմից ձեռնարկվում են բոլոր անհրաժեշտ միջոցառումները՝ հանցավորության դեմ պայքարն առավել արդյունավետ կազմակերպելու և կայուն հասարակական կարգ ու կանոն պահպանելու ուղղությամբ: