02.08.2022 01:05
ԱՀ ՆԳՆ ոստիկանություննն ամփոփում է անցած շաբաթը. 25.07.2022-01.08.2022թթ
Հուլիսի 25-ից օգոստոսի 1-ն ընկած ժամանակահատվածում Արցախում գրանցված դեպքերի և հանցագործությունների քրոնիկոնը.
Ոստիկանության 1-02 Հերթապահ մասերում հանցագործությունների և պատահարների վերաբերյալ ստացվել է ընդհանուր 60 հաղորդում, 42-ը՝ հանցագործությունների վերաբերյալ: Դրանցից 36-ն արդեն բացահայտվել և քննության փուլում է:
Նախորդ շաբաթվա համեմատ զգալիորեն նվազել է վիճաբանությունների և դրանց հետևանքով միմյանց մարմնական վնասվածքներ հասցնելու դեպքերի թիվը: Այս մասով ստացվել է 4 հաղորդում, որից 3 դեպք արդեն բացահայտվել է:
Յոթ օրվա ընթացքում գրանցվել է գույքի դիտավորությամբ ոչնչացման, դրամական շորթման, խուլիգանության և համակարգչային հանցագործության մեկական դեպքեր: Եվս մեկ հաղորդում ստացվել է պաշտոնեական կեղծիք կամ անփութություն բնութագրմամբ:
Հանցագործությունները բացահայտելու նպատակով՝ ոստիկանության ծառայողների կողմից ձեռնարկվել են օպերատիվ-հետախուզական միջոցառումներ:
Քրեական հետախուզության վարչության և տարածքային ստորաբաժանումների ծառայողներն անցած շաբաթվա ընթացքում բացահայտել են շրջանառությունն արգելված թմրանյութերի 5 դեպք, նախկինում կատարված 1 հանցագործություն:
Բնակչության հետ տարված պրոֆիլակտիկ աշխատանքների արդյունքում՝ զենք կամ ռազմամթերք հանձնելու նպատակով ոստիկանություն է դիմել 2 քաղաքացի:
Նախորդ շաբաթվա համեմատ ավելացել է ճանապարհատրանսպորտային պատահարների դեպքերը: Օպերատիվ կառավարման կենտրոնում գրանցվել է ճանապարհատրանսպորտային 24 պատահար, 20-ը՝ նյութական վնասով, 4-ը՝ մարմնական:
ՃՈ ճանապարհապարեկային ծառայողների կողմից բացահայտվել է առանց վարորդական վկայականի տրանսպորտային միջոց շահագործելու 39 դեպք, 19 վարորդ եղել է անսթափ վիճակում, 225-ը՝ գերազանցել է սահմանված արագությունը: Տրանսպորտային պատահարներից բուժհաստատություն է դիմել 9 քաղաքացի, նրանցից 2-ի վիճակը ծանր է:
ՆԳ նախարարության ոստիկանության կենտրոնական և տարածքային ստորաբաժանումների ծառայողները Հանրապետության տարածքում շարունակում են իրականացնել շուրջօրյա կազմակերպված աշխատանք՝ հանցավորության դեմ պայքարի արդյունավետ կազմակերպման և կայուն հասարակական կարգ ու կանոն պահպանելու ուղղությամբ:
Հետադարձ կապ՝ 1-02, 047 94 02 07