06.06.2022 01:13
ՃՏՊ՝ տուժել է մեկ քաղաքացի
Հունիսի 5-ին ժամը 21:35-ին ԱՀ ոստիկանության Հերթապահ մասում ՃՈ օպերատիվ կառավարման կենտրոնից հաղորդում է ստացվել, որ Մարտունի և Գարեգին Նժդեհ փողոցների խաչմերուկում ճանապարհատրանսպորտային պատահար է տեղի ունեցել:
Դեպքի վայր մեկնած ոստիկանության ծառայողները պարզել են, որ ժամը 21:20-ի սահմաններում, նշված խաչմերուկում իրար են բախվել Ստեփանակերտ քաղաքի բնակիչներ` 30-ամյա Ա.Ս.-ի և 42-ամյա Ա. Խ.-ի վարած «BMW» մակնիշի ավտոմեքենաները, ինչի հետևանքով վերջինս ստացած մարմնական վնասվածքներով տեղափոխվել է հանրապետական բժշկական կենտրոն։
Ստուգմամբ զբաղվում է ոստիկանության Ստեփանակերտ քաղաքի վարչությունը։
Վիճակագրությունը և դրա վերլուծությունը ցույց է տալիս, որ մարմնական վնասվածքներով ուղեկցվող ճանապարհատրանսպորտային պատահարների զգալի մասը տեղի են ունենում արագության ռեժիմը գերազանցելու և վարորդների անսթափ լինելու հետևանքով։
Ուստի, ՆԳ նախարարությունը վարորդներին հորդորում է խստագույնս պահպանել ճանապարհային երթևեկության անվտանգության կանոնները։