11.10.2021 16:39
ՆԳ նախարարության ոստիկանությունն ամփոփում է անցած շաբաթը 04.10.2021թ.-10.10.2021թ.
2021 թվականի հոկտեմբերի 4-ից 10-ն ընկած ժամանակահատվածում ոստիկանության տարածքային ստորաբաժանումների հերթապահ մասերում նախորդ շաբաթվա համեմատ՝ 14-ով ավելացել են իրավախախտումների վերաբերյալ ահազանգերը:
Ստացվել է ընդհանուր 52 հաղորդում, որից 40-ը հանցագործությունների վերաբերյալ: Դրանցից 35-ն արդեն բացահայտվել և ստուգման փուլում է:
Ըստ ոստիկանության օպերատիվ հաղորդագրությունների ամփոփագրերի` անցած շաբաթվա ընթացքում գրանցվել է մարմնական վնասվածք հասցնելու 7 դեպք:
Ոստիկանության քրեական հետախուզության վարչության և շրջանային բաժինների ծառայողների կողմից թմրամոլության դեմ ուժեղացված պայքարի արդյունքում՝ բացահայտվել է թմրամիջոցների ապօրինի աճեցման և իրացման 1 դեպք:
Նշված ժամանակահատվածում արձանագրվել է անձնական ունեցվածքի գողության 1, գույքի դիտավորությամբ ոչնչացման 2, խարդախության 3 դեպք:
Հերթապահ մասում ստացված բոլոր ահազանգերի հետքերով անմիջապես դեպքի վայրեր են մեկնել ոստիկանության տարածքային ստորաբաժանումների օպերատիվ խմբերը և օրենքով սահմանված կարգով ընթացքավորել դրանք։
Սպանության 1 դեպք է գրանցվել Մարտակերտում: Հոկտեմբերի 9-ին Մարտակերտ քաղաքի 55-ամյա բնակիչ Արամ Տեփնանցը, այգում հերկ կատարելու ժամանակ Ադրբեջանի զիված ուժերի դիպուկահարի կրակոցից մահացու վիրավորում է ստացել: Իրավապահ մարմինները կատարել են դեպքի վայրի և դիակի արտաքին զննություն: Նշանակվել է դիակի դատաբժշկական փորձաքննություն: Հարուցվել է քրեական գործ: Ստուգմամբ զբաղվում է ԱՀ քննչական կոմիտեն:
Բացահայտվել է նախկինում կատարված հանցագործությունների 4 դեպք, որից մեկը՝ խոշոր գումար հափշտակելու վերաբերյալ:
Հոկտեմբերի 2-ին հաղորդվել էր Ասկերանի շրջանի Բերքաձոր համայնքի վարչական տարածքում տեղակայված շինարարական ընկերությունից 49 միլիոն 200 հազար ՀՀ դրամ գումար գողանալու մասին: ԱՀ ոստիկանության ծառայողները համագործակցելով ՀՀ գործընկերների հետ, համատեղ ձեռնարկած օպերատիվ հետախուզական միջոցառումների արդյունքում դեպքը բացահայտվել են:
Յոթ օրվա ընթացքում հանրապետության տարածքում գրանցվել է ճանապարհատրանսպորտային 23 պատահար, որից 17-ը՝ նյութական վնասով, 6-ը՝ մարմնական:
Բուժհաստատություն է դիմել 4 քաղաքացի: Առանց վարորդական վկայականի մեքենա է վարել 7 վարորդ, 5-ը եղել են անսթափ վիճակում, 3 վարորդ գերազանցել է սահմանված արագությունը:
Համակարգի բոլոր ստորաբաժանումները հանրապետության տարածքում շարունակում են իրականացնել շուրջօրյա կազամակերպված աշխատանք՝ հանցավորության դեմ պայքարի արդյունավետ կազմակերպման և կայուն հասարակական կարգ ու կանոն պահպանելու ուղղությամբ: