26.09.2022 12:31
ՆԳ նախարարության Ոստիկանությունն ամփոփում է անցած շաբաթը. 19.09.2022 - 26.09.2022թթ.
2022 թվականի սեպտեմբերի 19-ից 26-ն ընկած ժամանակահատվածում ոստիկանության կենտրոնական և տարածքային ստորաբաժանումների Հերթապահ մասերում հանցագործությունների, իրավախախտումների և պատահարների վերաբերյալ ստացվել է ընդհանուր 38 հաղորդում, որից 24-ը՝ հանցագործությունների վերաբերյալ: Ոստիկանության ծառայողների համակարգված աշխատանքի շնորհիվ՝ դրանցից 21-ն արդեն բացահայտվել և քննության փուլում է:
Բացահայտվել է հերթապահ մասումգրանցված վիճաբանությունների և դրանց հետևանքով միմյանց մարմնական վնասվածքներ պատճառելու վերաբերյալ ստացված 2 հաղորդումները: Շաբաթվա ընթացքում գրանցվել է անձնական ունեցվածքի գողության 3, խարդախության, կողոպուտի, համակարգչային հանցագործության, պաշտոնեական լիազորությունների չարաշահման և ապօրինի ծառահատման մեկական դեպքեր:
Քրեական հետախուզության վարչության և շրջանային բաժինների ծառայողների համատեղ իրականացրած օպերատիվ հետախուզական միջոցառումների արդյունքում բացահայտվել է շրջանառությունն արգելված թմրամիջոցների 6 դեպք:
Բնակչության հետ տարված պրոֆիլակտիկ-բացատրական աշխատանքների արդյունքում՝ տարբեր տեսակի ու տրամաչափի ռազմամթերք է կամովին հանձել 3 քաղաքացի:
Հանցավորության դեմ պայքարի արդյունավետ կազմակերպման ուղղությամբ՝ ՆԳ նախարարությունը համագործակցում է Արցախի Հանրապետության իրավապահ բոլոր գերատեսչությունների հետ և ձեռնարկում օպերատիվ-հետախուզական միջոցառումներ, որի արդյունքում անցած շաբաթվա ընթացքում բացահայտվել է նախկինում կատարված 1 հանցագործություն:
Ճանապարհային ոստիկանության օպերատիվ կառավարման կենտրոնում գրանցված հաղորդումների տվյալներով, նախորդ շաբաթների համեմատ զգալիորեն նվազել է ՃՏՊ դեպքերը: Սեպտեմբերի 19-ից 26-ն ընկած ժամանակահատվածում գրանցվել է ճանապարհատրանսպորտային 15 պատահար, որից 13-ը՝ նյութական վնասով, 2-ը՝ մարմնական: Տրանսպորտային պատահարներից բուժհաստատություն է դիմել 3 քաղաքացի:
Ճանապարհապարեկային ծառայողների կողմից բացահայտվել է առանց վարորդական վկայականի տրանսպորտային միջոց շահագործելու 11 դեպք, 8 վարորդ եղել է անսթափ վիճակում, 175-ը՝ գերազանցել է սահմանված արագությունը:
ՆԳ նախարարության ծառայողներն Արցախի Հանրապետության տարածքում շարունակում են իրականացնել շուրջօրյա համակարգված աշխատանք: Հանցագործությունների բացահայտման և դրանց կանխարգելման միջոցառումներին զուգահեռ՝ ոստիկաններն ապահովում են կայուն հասարակական կարգ ու կանոն: