06.11.2022 00:08
Շղթայական ճանապարհատրանսպորտային պատահար Ստեփանակերտում. իրար են բախվել միանգամից 4 ավտոմեքենա
Նոյեմբերի 3-ին ժամը 15:50-ին, ՆԳՆ Ոստիկանության հերթապահ մասում, միաժամանակ ԱԻ պետական ծառայության ճգնաժամային կառավարման կենտրոնում քաղաքացուց հաղորդում է ստացվել, որ Վ. Սարգսյան և Գ.Լուսավորիչի փողոցները հատող խաչմերուկում ճանապարհատրանսպորտային պատահար է տեղի ունեցել:
Դեպքի վայր մեկնած ՆԳ նախարարության ծառայողները պարզել են, որ նույն օրը ժամը 15:40-ի սահմաններում, նշվածփողոցների խաչմերուկում իրար են բախվել Ստեփանակերտ քաղաքի բնակիչներ՝ 32-ամյա Ա.Հ.-ի վարած «Mitsubishi Outlander» և 20-ամյա Վ.Հ.-ի «Honda Fit» ավտոմեքենաները:
Բախումից «Mitsubishi Outlander» մեքենայի շարժիչի մասում հրդեհ է առաջացել, որից հետո վարորդը կորցնելով կառավարումը՝ ընթացել և բախվել է տեղանքում կայանված Ն. Պ.-ին (ծնված 1961թ.) պատկանող «Mercedes-Benz» ավտոմեքենային, որն էլ իր հեթին բախվել է Վ. Չ.-ին (ծնված 1977թ.) պատկանող «Nissan Versa» ավտոմեքենային:
Մեքենայում բռնկված հրդեհը մարվել է վթարի վայրում գտնվող մեր համաքաղաքացիների ջանքերով:
ՃՏՊ-ի հետևանքով «Honda Fit» ավտոմեքենայի ուղևորուհի՝ Լ. Ա.-ն (ծնված 1981թ.) մարմնական վնասվածք է ստացել և դիմել «Հանրապետական բժշկական կենտրոն»:
Ճանապարհային ոստիկանությունը երթևեկության բոլոր մասնակիցներին հորդորում է դժբախտ ելքով դեպքերից խուսափելու և արտակարգ պատահարները բացառելու նպատակով ցուցաբերել զգոնություն, չգերազանցել տրանսպորտային միջոցների համար սահմանված երթևեկության առավելագույն թույլատրելի արագությունը, պահպանել անվտանգության կանոնները: