06.05.2022 14:27
Ոստիկանության ենթասպա Աշոտ Դալլաքյանը կդառնար 41 տարեկան
Ոստիկանության պետ գնդապետ Արտյոմ Հարությունյանն այսօր համակարգի մի խումբ ծառայողների ուղեկցությամբ այցելել է Ստեփանակերտի Եղբայրական հուշահամալիր-պանթեոն, ծաղիկներ խոնարհել և խնկարկել ոստիկանության ենթասպա Աշոտ Ռուբենի Դալլաքյանի շիրմաքարի պատվանդանին, համակարգի ամբողջ անձնակազմի անունից շնորհավորել հերոս ոստիկանի երկնային ծնունդը, զորակցություն հայտնել Դալլաքյանների ընտանիքի անդամներին ու մտերիմներին:
ԱՀ ոստիկանության համակարգում Աշոտը ծառայության է անցել 2009թ. օգոստոսի 3-ից: 2019թ. հոկտեմբերի 4-ին նշանակվել է քրեակատարողական վարչության քրեակատարողական հիմնարկի փակ ուղղիչ տեղամասի կրտսեր տեսուչ։
2020 թվականի սեպտեմբերի 27-ից՝ ոստիկանության համահավաք գումարտակի անձնակազմի հետ Աշոտը մասնակցել է հայրենիքի պաշտպանության համար մղված թեժ մարտերին:
Զոհվել է 2020թ.հոկտեմբերի 15-ին՝ Հադրութի շրջանի «Թութակ» կոչվող տեղամասում՝ անօդաչու թռչող սարքի հարվածից։
ԱՀ Նախագահի հրամանագրով՝ հետմահու պարգևատրվել է «Արիություն» մեդալով:
ՆԳՆ ծառայողներն այնուհետև հարգանքի տուրք են մատուցել ոստիկանության լեյտենանտ Տիգրան Պետրոսյանի շիրմաքարին: