26.04.2022 13:10
Ոստիկանության Ստեփանակերտ քաղաքի վարչությունն ամփոփել է 2022թ. 1-ին եռամսյակի ընթացքում կատարած աշխատանքը
Վարչության ծառայողները նախ, հոտնկայս ու լռությամբ հարգել են զոհված համածառայակից՝ Ժիրայր Ենգիբարյանի հիշատակը, այնուհետև հիմնական զեկուցող՝ քաղաքային վարչության պետ Բորիս Ջալավյանը ոստիկանության պետին է ներկայացրել կատարած աշխատանքները։
Ստեփանակերտ քաղաքում բոլոր ծառայությունների գծերով գրանցվել է հանցագործության 253 դեպք՝ նախորդ տարվա նույն ժամանակահատվածի 180-ի համեմատ. աճը կազմել է 73 դեպք, որի տեսակարար կշիռը հանրապետությունում բոլոր գծերով գրանցված հանցագործությունների թվում կազմում է 16.9%:
Հանցագործությունների ընդհանուր քանակի աճման պարագայում աճել է նաև հանցավորության մակարդակը։ Հաշվետու ժամանակահատվածում 1000 բնակչին բաժին ընկնող հանցագործությունների թիվը Ստեփանակերտ քաղաքում կազմել է 4%։
Ըստ ծանրության աստիճանի՝ 3 դեպքով նվազել է առանձնապես ծանր հանցագործությունների քանակը, անփոփոխ է ծանր հանցագործությունների քանակը, 17 դեպքով նվազել է միջին ծանրության հանցագործությունները, 82 դեպքով աճել է ոչ մեծ ծանրության հանցագործությունների քանակը:
Գրանցված հանցագործություններից 238-ը բացահայտման տոկոսում հաշվվող հանցագործություններ են ՝ 2021թ. 1-ին եռամսյակի 176-ի համեմատ:
Հանցավորության կառուցվածքում նախորդ տարվա նույն ժամանակահատվածի համեմատությամբ աճել են մարդու դեմ ուղղված, հասարակական անվտանգության, հասարակական կարգի և բնակչության առողջության դեմ ուղղված, տնտեսական գործունեության դեմ ուղղված, իսկ նվազել՝ սեփականության դեմ ուղղված, պետական իշխանության, ծառայության, կառավարման կարգի դեմ ուղղված հանցագործությունների տեսակարար կշիռները:
Անդրադառնալով հանցագործությունների բացահայտման ցուցանիշներին, քննարկվող ժամանակահատվածում բացահայտման արդյունավետությունը աճել է 62.1%-ով:
Վարույթում գտնվող քրեական գործերով հանցագործություններից բացահայտվել են 161 դեպք, 2021թ. 1-ին եռամսյակի 63-ի համեմատ:
2022թ. 1-ին եռամսյակում բացահայտված և բացահայտման տոկոսում հաշվվող 161 հանցագործություններից 30-ը՝ բացահայտվել են քրեական հետախուզության (ՔՀԲ և ՔՀՎ), 26-ը՝ տեղամասային տեսուչների, 59-ը՝ հետաքննիչների, 43-ը՝ ճանապարհային ոստիկանության, 3-ը՝ այլ ծառայությունների կողմից:
2022թ. 1-ին եռամսյակում հանցագործություն կատարած անձանց թիվը կազմել է 143, որոնցից 85-ը քրեական հետախուզության գծով հանցագործություն կատարած անձինք են։ Քրեական պատասխանատվության են ենթարկվել 24 անձ, ինչպես նաև 119-ի նկատմամբ կարճվել են քրեական գործերը կամ մերժվել նյութերը՝ ոչ արդարացվող հիմքերով:
Հաշվետու ժամանակահատվածում Ստեփանակերտ քաղաքի ոստիկանության վարչության ծառայողները շարունակել են ակտիվ միջոցառումները հանցագործությունների կանխարգելման, հայտնաբերման և բացահայտման ուղղությամբ:
Ոստիկանության պետ գնդապետ Արտյոմ Հարությունյանը տվել է մի շարք հանձնարարականներ՝ ձեռնարկել բոլոր անհրաժեշտ միջոցառումները հանցավորության դեմ պայքարն առավել արդյունավետ կազմակերպելու, կայուն հասարակական կարգ ու կանոն պահպանելու, անձնակազմի շրջանում կատարողական և ծառայողական կարգապահությունն ամրապնդելու ուղղությամբ: