16.10.2021 17:54
Փա՛ռք և հավերժ հիշատակ հայրենիքի պաշտպանության համար անմահացած բոլոր ոստիկաններին. Բենիկ Համբարձումյան.
Մեկ տարի առաջ այս օրը՝ 2020 թվականի հոկտեմբերի 16-ին, Հադրութի շրջանում անմահացավ ոստիկանության լեյտենանտ Բենիկ Համբարձումյանը: Այսօր հերոսի հիշատակի օրն է:
Բենիկ Համբարձումյանի մահվան առաջին տարելիցի կապակցությամբ, այսօր Երևանի Եռաբլուր-պանթեոնում հերոսի հիշատակին հարգանքի տուրք են մատուցել ոստիկանության համակարգի մի խումբ ծառայողներ՝ ոստիկանության պետի տեղակալ Վրույր Խաչատրյանի, տնտեսական և կոռուպցիոն հանցագործությունների դեմ պայքարի վարչության պետ Իգոր Օհանյանի, Ստեփանակերտ քաղաքի վարչության պետ Բորիս Ջալավյանի գլխավորությամբ:
Բենիկի հարազատներին ու մտերիմներին զորակցություն են հայտնել նաև ոստիկանության նախկին պետ՝ ԱԱԾ տնօրեն Աշոտ Հակոբջանյանը, ՀՀ-ում Արցախի Հանրապետության ոստիկանության ներկայացուցիչ Արթուր Հովհաննիսյանը:
Բենիկ Դավթի Համբարձումյան
Ծնվել է 1996թ. հունիսի 6-ին Ասկերանի շրջանի Քռասնի գյուղում։
2014-2016թթ.ծառայել է ԶՈւ շարքերում։
2020 թ.սեպտեմբերի 10-ից ծառայության է անցել ԱՀ ոստիկանության տնտեսական և կոռուպցիոն հանցագործությունների դեմ պայքարի վարչության տնտեսական հանցագործությունների դեմ պայքարի բաժնում, որպես օպերլիազոր։
Ուներ ոստիկանության լեյտենանտի կոչում։
2020 թվականի սեպտեմբերի 27-ից՝ ոստիկանության համահավաք գումարտակի անձնակազմի հետ մասնակցել է հայրենիքի փրկության մարտերին:
Զոհվել է 2020թ.հոկտեմբերի 16-ին՝ Հադրութի շրջանի «Թութակ» տեղամասում։
ԱՀ Նախագահի հրամանագրով հետմահու պարգևատրվել է «Արիություն» մեդալով: Հանգչում է Երևանի Եռաբլուր-պանթեոնում: