14.02.2022 15:48
ԱՀ ՆԳ նախարարության ոստիկանությունն ամփոփում է անցած շաբաթը. 07.02.2022-13.02.2022թթ.
Ոստիկանության տարածքային ստորաբաժանումների հերթապահ մասերում իրավախախտումների վերաբերյալ փետրվարի 7-ից 13-ն ընկած ժամանակահատվածում ստացվել է ընդհանուր 51 հաղորդում։
Հերթապահ մասերում ստացված բոլոր ահազանգերի հետքերով անմիջապես դեպքի վայրեր են մեկնել ոստիկանության տարածքային ստորաբաժանումների օպերատիվ խմբերը և օրենքով սահմանված կարգով ընթացքավորել դրանք։
Շաբաթվա ընթացքում ճանապարհային ոստիկանության օպերատիվ կառավարման կենտրոնում գրանցվել է ճանապարհատրանսպորտային 31 պատահար, որից 26-ը նյութական վնասով, 5-ը՝ մարմնական։ Բուժհաստատություն է դիմել 5 քաղաքացի։
Փետրվարի 9-ին հաղորդում է ստացվել Ստեփանակերտ-Շուշի ավտոճանապարհի 10-րդ կմ-ին տեղի է ունեցել ՃՏՊ-ի մասին։ Նախնական տվյալներով Երևան քաղաքի բնակիչն իր վարած «Mercedes-Benz» մակնիշի ավտոմեքենայով բախվել է ՌԴ խաղաղապահ զորակազմի զրահատեխնիկային, տուժել է մեկ քաղաքացի:
Օգնություն ցուցաբերելու նպատակով անմիջապես դեպքի վայր են մեկնել ՆԳ նախարարության ոստիկաններն ու փրկարարներն, Շտապ բժշկական օգնություն կայանի հերթապահ բժիշկների խումբը։
ՃՏՊ հետևանքով Շահումյանի շրջանի Քարվաճառ քաղաքում հաշվառված 35-ամյա բնակիչը ստացած մարմնական վնասվածքներով տեղափոխվել է Հանրապետական բժշկական կենտրոն։
Ըստ բժիշկներից ստացված տեղեկության, վարորդի վիճակը բավարար է, իսկ տուժածի առողջական վիճակը` միջին ծանրության, կայուն։ Նրանց կյանքին վտանգ չի սպառնում։
Ճանապարհատրանսպորտային պատահարի մասին հերթական հաղորդումը ստացվել է նույն օրը ժամը 23:00-ին՝ Ստեփանակերտ քաղաքի Նաբերեժնայա փողոցում: Ահազանգը ստանալուն պես՝ ոստիկաններն ու փրկարարները մեկնել են դեպքի վայր: Պարզվել է, որ Ստեփանակերտ քաղաքի բնակիչը, վարելով «Mercedes benz sprinter» մակնիշի ավտոմեքենան կողաշրջվել է:
Փրկարարներն անմիջապես հոսանքազրկել են մեքենան և «Կռունկ»-ի միջոցով ուղղել: Տուժածներ չկան:
Շաբաթվա ընթացքում տրանսպորտային միջոցում հրդեհ բռնկվելու մասին 2 դեպք է արձանագրվել՝ Ստեփանակերտ քաղաքում և Մարտունու շրջանում: Բարեբախտաբար 2 դեպքում՝ ոչ ոք չի տուժել:
Յոթ օրվա ընթացքում առանց վարորդական վկայականի տրանսպորտային միջոց է շահագործել 38 վարորդ, 26-ը եղել է անսթափ վիճակում, 394 վարորդ գերազանցել է սահմանված արագությունը:
Մեկ շաբաթվա ընթացքում բացահայտվել է նախկինում կատարված հանցագործությունների 3 դեպք, որից 1-ը՝ 2020 թվականի ռազմական գործողությունների ընթացքում կատարված գողության դեպքեր են: Հայտնաբերվել է նաև հետախուզման մեջ գտնվող մեկ քաղաքացի:
ՆԳ նախարարության ոստիկանության բոլոր ստորաբաժանումները հանրապետության տարածքում իրականացրել են ուժեղացված ծառայություն՝ վերահսկել օպերատիվ իրավիճակը, կազմակերպել հանցավորության դեմ արդյունավետ պայքար և պահպանել կայուն հասարակական կարգ ու կանոն:
Ըստ ոստիկանության օպերատիվ հաղորդագրությունների ամփոփագրերի` անցած շաբաթվա ընթացքում գրանցվել է համակարգչային հանցագործության 5, մարմնական վնասվածք հասցնելու 8, անձնական ունեցվածքի գողության 1, խարդախության և գույքի դիտավորությամբ ոչնչացման 2 դեպք։
Ոստիկանության քրեական հետախուզության վարչության և շրջանային բաժինների ծառայողների կողմից թմրամոլության դեմ ուժեղացված պայքարի արդյունքում բացահայտվել է թմրամիջոցների ապօրինի աճեցման և իրացման 5 դեպք: