ԿԱՅՔԻ ՔԱՐՏԵԶ
ԹԵԺ ԳԻԾ
23.01.2022 13:16
Արսեն Հարությունյանը կդառնար 39 տարեկան
Արսեն Կարենի Հարությունյան
Հերոսը կդառնար 39 տարեկան
Հայաստանի Հանրապետությունում Արցախի Հանրապետության ոստիկանության ներկայացուցիչ Արթուր Հովհաննիսյանն այսօր՝ հունվարի 23-ին, ոստիկանության երջանկահիշատակ կապիտան Արսեն Հարությունյանի ընտանիքի անդամների հետ այցելել է «Եռաբլուր» զինվորական պանթեոն և հարգանքի տուրք մատուցել Արցախյան երրորդ պատերազմի ընթացքում անմահացած ոստիկանության ծառայողի շիրիմին, զորակցություն հայտնել Հարությունյանների ընտանիքի անդամներին:
Ոստիկանության կապիտան Արսեն Հարությունյանի ծննդյան օրն է այսօր: Հերոսը կդառնար 39 տարեկան:
Արսենը ոստիկանության համակարգում ծառայության է անցել 2003թվականից:
2018 թ. հուլիսի 31-ին նշանակվել է ԱՀ ոստիկանության Ստեփանակերտ քաղաքի վարչության պարեկապահակետային ծառայության գումարտակի 2-րդ վաշտի հրամանատար։
Սեպտեմբերի 27-ից՝ ոստիկանության համահավաք գումարտակի անձնակազմի հետ մասնակցել է հայրենիքի պաշտպանության համար մղված թեժ մարտերին:
Զոհվել է 2020թ. հոկտեմբերի 16-ին՝ Հադրութի շրջանի «Թութակ» տեղամասում։
ԱՀ նախագահի հրամանագրով հետմահու պարգևատրվել է «Մարտական խաչ» 2-րդ աստիճանի շքանշանով:
Նշենք, որ ՆԳ նախարար Կարեն Սարգսյանի հանձնարարությամբ, ծննդյան և հիշատակի օրերին համակարգի ծառայողներն այցելում են զոհված համածառայակիցների շիրիմներին, հարգանքի տուրք մատուցում հայրենիքի պաշտպանների հիշատակի առաջ:
