22.05.2023 14:58
ՆԳՆ ոստիկանությունն ամփոփում է անցած շաբաթը. 15.05.2023-22.05.2023թթ.
2023 թվականի մայիսի 15-ից 22-ն ընկած ժամանակահատվածում ոստիկանության կենտրոնական ու տարածքային ստորաբաժանումների հերթապահ մասերում հանցագործությունների և իրավախախտումների վերաբերյալ գրանցվել է 40 հաղորդում:
Հերթապահ մասերում ստացված բոլոր ահազանգերի հետքերով անմիջապես դեպքի վայրեր են մեկնել ոստիկանության օպերատիվ խմբերը և օրենքով սահմանված կարգով ընթացքավորել դրանք։
Ստացված հաղորդումներից 27-ը հանցագործությունների մասին է, դրանցից 25-ն արդեն բացահայտվել և քննության փուլում է: Անբացահայտ է մնացել հանցագործության 2 դեպք:
Ոստիկանության ճանապարհային ոստիկանության օպերատիվ կառավարման կենտրոնում մայիսի 15-ից 2-ն ընկած ժամանակահատվածում գրանցվել է 174 արձանագրություն: Յոթ օրվա ընթացքում գրանցվել է ՃՏ 8 պատահար, որից 4-ը նյութական, 4-ը՝ մարմնական վնասով: Պատահարներից 5 անձ դիմել է բուժհաստատություն։
Նշված ժամանակահատվածում առանց վարորդական վկայականի տրանսպորտային միջոց է շահագործել 40 վարորդ, 16-ը եղել է անսթափ վիճակում, 57 վարորդ գերազանցել է սահմանված արագությունը:
Շաբաթվա ընթացքում դիակի հայտնաբերման 2 դեպք է գրանցվել, որից մեկը՝ մայիսի 16-ին Վ. Սարգսյան փողոցի թիվ 8/1 հասցեում: Ոստիկանության հետաքննիչները պարզել են, որ նշված հասցեում հայտնաբերված դիակը հանդիսանում է Աշոտ Բաբայանը (ծնված 1962թ.): Զննությամբ դիակի վրա արտաքին բռնության հետքեր չեն հայտնաբերվել:
Նշանակվել է դատաբժշկական փորձաքննություն:
Իսկ մայիսի 17-ին ժամը 18:50-ին ոստիկանության Մարտունու շրջբաժնի Կարմիր Շուկայի բաժանմունքում հաղորդել են, որ Սոս համայնքի վարչական տարածքում՝ բաց դաշտում հայտնաբերել են Յուրիկ Աբրահամյանի (ծնված 1977թ.) դին: Դիակի զննությանբ բռնության հետքեր չեն հայտնաբերվել:
Բացահայտվել է հերթապահ մասում գրանցված կենցաղային հողի վրա ստեղծված վիճաբանությունների և դրանց հետևանքով միմյանց մարմնական վնասվածք պատճառելու բոլոր 6 դեպքերը:
Ոստիկանության ծառայողների կողմից ձեռնարկված օպերատիվ միջոցառումների արդյունքում բացահայտվել են խարդախություն բնութագրմամբ 5 և հափշտակության 1 դեպք:
Քրեական հետախուզության վարչության և տարածքային ստորաբաժանումների ծառայողների համատեղ իրականացված հետախուզական միջոցառումների արդյունքում` շաբաթվա ընթացքում բացահայտվել է թմրանյութի ապօրինի շրջանառության 4 դեպք։
Տնտեսական և կոռուպցիոն հանցագործությունների դեմ պայքարի վարչությունը միջոցներ է ձեռնարկում վերջին ժամանակահատվածում հաճախակիացած համակարգչային հանցագործությունների բացահայտման ուղղությամբ:
Բնակչության հետ տարված բացատրական աշխատանքների արդյունքում՝ զենք-զինամթերք կամովին հանձնելու նպատակով, ոստիկանություն է դիմել 2 քաղաքացի:
ՆԳ նախարարության ոստիկանության բոլոր ստորաբաժանումները հանրապետության տարածքում շարունակում են իրականացնել ուժեղացված ծառայություն, վերահսկել օպերատիվ իրավիճակը, կազմակերպել հանցավորության դեմ արդյունավետ պայքար և պահպանել կայուն հասարակական կարգ ու կանոն:
Հերթապահ մաս՝102, /047/94-02-07
ՃՈ ՕԿԿ /047/94-02-17