26.07.2022 11:49
Ոստիկանության Մարտակերտի շրջանային բաժինն ամփոփում է 2022 թվականի առաջին կիսամյակի օպերատիվ-ծառայողական գործունեությունը
Բոլոր ծառայությունների գծերով գրանցել է հանցագործությունների 163 դեպք: Նախորդ տարվա նույն ժամանակահատվածի համեմատ՝ աճը կազմել է 37 դեպք:
Բաժնի պետ գնդապետ Ռոմա Հարությունյանի խոսքով, համագործակցելով իրավապահ մյուս կառույցների հետ, հաշվետու ժամանակահատվածում շարունակվել է հանցավորության դեմ պայքարը, ինչի արդյունքում շրջանում վերահսկվել է օպերատիվ իրավիճակը և պահպանվել հասարակական կարգը:
Նախորդ տարվա առաջին կիսամյակի համեմատ, Մարտակերտի շրջանում նվազել է հանցավորության մակարդակը: Ընդհանուր հանցագործությունների բացահայտման արդյունավետությունն աճել է 22 տոկոսով:
Ըստ ծանրության աստիճանի 25 դեպքով աճել է ոչ մեծ ծանրության, 16 դեպքով նվազել միջին ծանրության, 5 դեպքով նվազել է ծանր, իսկ առանձնապես ծանր հանցագործությունները մնացել են անփոփոխ:
2022 թվականի առաջին կիսամյակի ընթացքում վարույթում գտնվող քրեական գործերով բացահայտված 65 դեպքերով հանցագործություն է կատարել 61 անձ, որոնցից 24-ի վերաբերյալ քրեական գործերն ուղարկվել են դատարան, 37-ի նկատմամբ՝ կարճվել կամ նյութերը մերժվել են ոչ արդարացման հիմքերով:
Քննության փուլում գտնվող 147 հանցագործություններից 42-ով հայտնի չեն հանցանք կատարած անձինք: Բացահայտման ուղղությամբ ոստիկանության Մարտակերտի շրջանային բաժինն իրականացնում է համապատասխան աշխատանքներ:
Շրջանային բաժնում շուրջօրյա պայքար է տարվում թմրամիջոցների, դրանց աճեցման և իրացման, ապօրինի զենք կամ ռազմամթերք ձեռք բերելու և պահելու, շրջակա միջավայրի պաշտպանության ուղղությամբ:
Բնակչության հետ տեղամասային տեսուչների պարբերաբար հանդիպումները և տարվող բացատրական աշխատանքները միտված են եղել շրջանում արատավոր երևույթները բացառելու և հասարակական կարգը բարձր մակարդակով ապահովելու համար: